Advertise with us (954) 652-9874 / radiobiznispam@gmail.com ... Ecoutez Radio Biznis Pam Par Telephone: 712-432-3257 | 605-477-5152 | 712-432-5369

OFFICIAL PRESS RELEASE FROM NEW BAND "WOW"!
#1
Read the official press release from the group "WOW" below....
[Image: wowpresscf.jpg]
                                                            
                                                WOW antre an gran jan sou mache Konpa a

Miyami, 15 sektanm 2016.- Pandan lane 2016 sa a, li klè pou tout moun, Konpa a ap pran bon jan jarèt.  Kit se gwoup pwa 50 oswa jenn gwoup ki fenk ap louvri zèl yo, tout ap travay kon mèt Jan Jak pou blayi mizik wololoy san rete sou radyo ak melomàn sou rezo sosyal yo. Depi lane sa a kòmanse, gen ozanviwon 60 mizik Konpa ki gentan sòti. Anpil ladan yo ap taye banda nan tout radyo ak sou entènèt la.

Se nan mitan bèl banbòch mizikal sa a, 3 mizisyen ayisyen chaje talan ki abite nan Miyami, mete tèt yo ansanm pou mete kanpe yon gwoup Konpa ak yon non k ap fè tout moun plezi : WOW.
3 kavalye pòlksa sa yo se Money G (Jean Junior Marcelus), Prince Rocher (Emmanuel Rocher Jean Baptiste) ak Gabriel Laporte. 

Money G se yon chantè ak yon konpozitè ki gen don pou marye vwa rosiyòl  li a ak melody ladouskivyen pou fè plim danse sou po moun tout bon melomàn. Se misye ki te chante ‘’Koute Kè Mwen’’, yon kokenn chenn hit ki sou albòm ‘’Wè L Fè L’’ gwoup Gabel. Albòm sa a te sòti an 2007. Se grasa gwoup sa a Money G te kòmanse layite kò l sou mache Konpa a. 

Prince Rocher li menm, se yon chantè djòl loulouz. Misye gen yon vwa rale mennen vini, kole w pran, pa kole w pran. Kou l kòmanse chante, tout jenn fanm toujou pran lwa latranblab, pa konn kote pou mete kò yo. Sa fè 4 lane depi Prince Rocher gen yon hit manman penmba ka p fè laviwonndede sou tout radyo nan peyi d Ayiti ak nan dyaspora a. Li rele ‘’N ap Rewè Ankò’’. Chante sa te sòti an 2014 sou albòm ‘’New Chapter’’ gwoup 5 Etwal. Malgre gen lòt gwo hit ki sòti apre sa, ankenn nan yo pa janm vreman briding ‘’N ap Rewè Ankò’’.

‘’Mwen vle di fanatik mwen yo jodia se nan WOW mwen ye. Pwojè DREAM nan fonn anndan WOW pou m ka pote pi bèl mizik pou yo. Djakout nou chaje pou fè tout moun plezi’’, se deklarasyon Prince Rocher.

Gabriel Laporte se 3èm kavalye pòlka a. Misye fè gwo manman eksplwa deja nan mache Konpa a. Tout moun konn non sa a. Li ekri pawòl mizik, konpoze, chante epi se yon kokenn chenn gitaris. Depi se pou Konpa, kèlkilanswa fòm Konpa a, kòd gita pa gen sekrè pou Laporte. Se pa pou san rezon, anpil Pwodiktè ak Aranjè toujou bezwen gen Laporte nan mizik yo akoz solo misye se koupe dwèt. Dènye gwoup misye te jwe se te Nu Look.

‘’M vle tout moun konnen mwen pa kite Nu Look pou rezon k ap di nan medya yo. M pa gen ankenn pwoblèm ak Arly Larivière, yon bon zanmi m depi lontan. Mwen santi m gen kapasite lakay mwen pou m pwouve plis bagay nan mizik. Refleksyon pa m montre m l ap pi fasil pou m fè sa nan gwoup WOW’’, se sa Laporte di pou demanti tout rimè sou rezon ki fè l kite Nu Look.

Pou kounye a, WOW ap travay sou premye albòm-estidyo. Nan yon tan ki pa twò long, n ap konn dat l ap sòti. Laprès mizikal la gen pou resevwa yon envitasyon pou vin asiste prezantasyon ofisyèl gwoup la. Pandan tan sa a,  tout moun ki renmen bon mizik ka al koute 3 mizik WOW ki disponib sou Soundcloud. Mizik sa yo se : WOW ; Gòl A Men et Lies (Kraze Rèv).  Pa gen dout ou pral di WOW lè w fenk premye koute yo.

Men kijan ou ka antre an kontak ak WOW :
 
Loudley | Manager | + 1 (845)270-5814 | Email :  wowmizik@yahoo.com

Suiv ak Renmen WOW sou Rezo Sosyal yo :
 
Twitter : @wowmizik | Facebook : @WowMizik  | Instagram: wow_mizik
Se La Bagay Yo Ye!

Phone: 954-652-9874
E-mail: radiobiznispam@gmail.com
Reply

Facebook Share



Forum Jump:


Users browsing this thread: 1 Guest(s)